د امریکا فضايي څېړنو اداره یا ناسا وايي د «انسایټ مارس لینډر» په نوم پر مریخ تازه کته شوې بېړۍ د انسانانو په تاریخ کې په لومړي ځل د زلزلې ټکانونه حس کړي دي.
د امریکا کلېفورنیا په پیساډینا کې ماهرینو دې ټکانونو ته «مارس کوېک» یا د مریخ زلزلې نوم ورکړی دی چې په وینا يې دا درې ټکانونه ډېر زورور نه وو.
تر دې وړاندې ستور مزلو په مریخ یا سرې سیارې کې د زلزلو د ټکانونو په اړه ګومان کړی و، خو دا لومړی ځل دی چې د یوې خلايي بېړۍ په وسېله د مریخ د زلزلې ټکانونه ریکاډېږي.
ساینسپوهانو د تېر مېلادي کال په نومبر میاشت کې د مریخ داخلي حرارت، خاورې کیفیت، د مریخ چورلښت او ټکانونو د مالومولو لپاره دا خلايي بېړۍ واستوله.
د دې ماموریت مشر فلېپ لاګنون وايي، ډېر زیات خوشاله دی چې د مریخ په اړه یې تازه مالومات پيدا کړل او په وینا یې دا تازه مالومات به د مریخ په داخلي کیفیت په اړه له دوی سره لا مرسته وکړي.