د افغانستان نړیوال نندارتون مسؤلان وايي، د امام ابوحنیفه رح څلورم پړاو نندارتون به ډېر ژر په کابل کې جوړ شي.
د یاد نندارتون مشر محمد صابر لطیفي رسنیو ته وویل، په دغه نندارتون کې به د ۱۵ هېوادونو سوداګر او پانګه وال برخه واخلي او دا به د افغانستان د صنعت او سوداګرۍ ودې لپاره نوي فرصتونه رامنځ ته کړي.
د لطیفي په خبره دغه نندارتون به د روانې عقرب میاشتې په ۲۶مه پيل او تر یوې اونې به دوام وکړي.
پانګه وال او سوداګر دا ډول نندارتونونه د صنعت او سوداګرۍ ودې لپاره ګټور بولي.
دوی زیاتوي دا ډول نندارتونونه د هېوادونو تر منځ د همکارۍ او تجربو په شریکولو کې مهم رول لوبوي.