د اولاد سالمه اسلامي تربیه عظيم اهميت لري ځکه د اولاد تربيه د کورنۍ اصلاح ، د کلي ، کوڅې ، مکتب او ټولنې اصلاح ده چې ستر فضيلت لري د والدين او اولاد د پاره د دنيا او آخرت سعادت او کاميابي ده ، د اولاد د تربيت فضيلت په لاندې څو ټکو کې خلاصه کولای شو :
۱- والدینو ته د اولاد په صالح علم کې اجر دی :
رسول الله صلی الله عليه وسلم فرمايلي : مَنْ دَعَا إِلَى هُدًى كَانَ لَهُ مِنْ الْأَجْرِ مِثْلُ أُجُورِ مَنْ تَبِعَهُ لَا يَنْقُصُ ذَلِكَ مِنْ أُجُورِهِمْ شَيْئًا (رواه مسلم ).
ژباړه : چا چې د نيکۍ طرف ته خلک دعوت کړل نو ده لره به د هغو ټولو خلقو هومره اجر او ثواب وي څوک چه د ده د دعوت سره يې نيک عمل شروع کړی وي .او ددې نيک عمل کونکو له عمله به هيڅ نه کميږي .
او څوک چې د چا د ګمراهۍ او انحراف سبب شو نو د هغه په ګناه کې به هم ورسره شريک وي :
« مَنْ دَعَا إِلَى ضَلَالَةٍ كَانَ عَلَيْهِ مِنْ الْإِثْمِ مِثْلُ آثَامِ مَنْ تَبِعَهُ لَا يَنْقُصُ ذَلِكَ مِنْ آثَامِهِمْ شَيْئًا» (مسلم )
ژباړه:چا چې خلک د يوی ګمراهی طرف ته دعوت کړل نو ددغې ګناه به هومره ګناه وي چې کوم ګناه کونکو دده د ګمراه کونکي عمل په وجه بې لاری شوي وي او د دغه خلکو په ګناه کې به هم کوم کمی نه راځی .
۲- د مرګ څخه وروسته د صالح عمل دوام :
رسول الله صلی الله عليه وسلم فرمايي :إِذَا مَاتَ الْإِنْسَانُ انْقَطَعَ عَنْهُ عَمَلُهُ إِلَّا مِنْ ثَلَاثَةٍ: إِلَّا مِنْ صَدَقَةٍ جَارِيَةٍ، أَوْ عِلْمٍ يُنْتَفَعُ بِهِ، أَوْ وَلَدٍ صَالِحٍ يَدْعُو لَهُ ( المسلم ۱۶۳۱ ) .
ژباړه : کله چې انسان مړ شي عمل يې قطع کيږي بغير له دريو څيزونو : جاريه صدقه ، يا داسې علم چې له هغه څخه د خير استفاده کيږي او يا صالح اولاد چه د مور او پلار د پاره دعا کوي.
۳- د لوڼو د تربيت اجر :
رسول الله صَلَّى اللَّهُ عَلَيْهِ وَآلِهِ وَسَلَّمَ فرمايي: «مَنْ کانت له ابنتان فَأَحْسَنَ إِلَيْهِما كُنَّ لَهُ سِتْرًا مِنْ النَّارِ» (ابن ماجه و ابن حبان ).
ژباړه:څوک چې دوې لورګانې ولري او په ښه او نيکه توګه له هغوی سره سلوک وکړي ، د ده لپاره د دوزخ د اور مانع وګرځي »
همداسې د خويندو سره ښه سلوک کول لوی اجر لري :«من رُزق بناتٍ أو أخواتٍ فأحسن إليهِنَّ کُنَّ له ستراً من النار» (متفق عليه ) .
ژباړه : څوک چې په لوڼو يا خويندو خرڅ وکړي (سالمه روزنه او پالنه يې وکړي) او له هغوی سره نيک چلن وکړي هغه ته به د دوزخ د اور څخه د نجات سبب شي.
۴- په دنيا کې عزت او په نيک نوم يادول :
لکه څنګه چې الله تعالی خپل نبي اسماعيل عليه السلام ستايلی دی چې هغه خپل اهل ته په لمانځه حکم کولو او د خپل اهل نيک تربيت يې کولو ، لقوله سبحانه وتعالی :[ وَكَانَ يَأْمُرُ أَهْلَهُ بِالصَّلاَةِ وَالزَّكَاةِ وَكَانَ عِندَ رَبِّهِ مَرْضِيًّا](مريم :۵۵).
ژباړه: او ده به خپل اهل ته په لمانځه او زكات سره حكم كاوه او دى د خپل رب په نیز پسندیده و.
او خپل رښتنې بنده ګان يې ستايلي دي چې هغوی د خپل ځان په اصلاح اکتفا نه کوي بلکي د خپل اهل عيال اصلاح هم له خپل رب څخه غواړي، قال الله تعالى: وَالَّذِينَ يَقُولُونَ رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا ( الفرقان: 74).
ژباړه : او هغه کسان دي دعاوي کوي : ای زمونږ ربه ! مونږ ته له خپلو ميرمنو او اولادونو څخه د سترګو يخيدل راکړه او مونږ د ځان ساتونکو امامان کړه .
۵- د قيامت په ورځ عزت او شرف :
رسول الله صلی الله عليه وسلم فرمايي:«مَن قرأ القرآن وعمل به ألبس والداه تاجاً يوم القيامة ضوءه أحسن من ضوء الشّمس في بيوت الدنيا فمَا ظنُّكم بالّذي عمل بهذا» (رواه أبو داود والحاكم، وقال: صحيح الإسناد).
ژباړه: چا چې قرآن ولوستو او په قرآن يې عمل وکړ نو د قيامت په ورځ به د هغه د والدينو په سر باندې داسې تاج ور په سر شي چې د هغې رڼا به د لمر د رڼا نه کوم چې زمونږ د دنيا په کورونو کې وي ډيره ښايسته وي ددې وروسته رسول الله صلی الله عليه وسلم وفرمايل: نو تاسې څه ګمان کوﺉ د هغه چا په باره کې چا چه خپله دا عمل کړی وي..
۶- د اولاد د پاره تر ټولو غوره ډالۍ :
رسول الله صلی الله عليه وسلم فرمايلي: «هيڅ يوه غوره ډالي د والدينو له طرفه خپلو ماشومانو ته تر ښه تربيه نشته» (رواه الطبراني).