الحمدلله! ای د حج مبارکو مېلمنو، الله سبحانه وتعالی تاسو ته د دې مبارک سفر توفيق درکړ، نو دا سفر د خپل ژوند تر ټولو مهم او بختور فرصت وګڼئ. دا د الله تعالی د نزدېکت، د ايماني جذبو، د دعاوو د قبلېدو، او د زړونو د صفا کولو سفر دی. هڅه وکړئ چې د حج دا څو ورځې د عبادت، توبې، او دعا لپاره تر ټولو غوره وکاروئ.
۱- نیت خالص کړئ
خپل نیت یوازې د الله تعالی رضا ته ځانګړی کړئ.
د حج موخه باید د نفس پاکوالی، د ګناهونو معافي، او د آخرت نجات وي.
رسول الله ﷺ فرمايي: “الحُجّاجُ والعُمّارُ وَفْدُ اللهِ، إنْ دَعَوهُ أجابَهُمْ، وإنِ اسْتَغْفَروهُ غَفَرَ لَهُمْ” (ابن ماجه).
ژباړه: حاجیان او عمره کوونکي د الله مېلمانه دي، که دعا وکړي الله يې قبلي، او که بخښنه وغواړي، الله يې بښي.
۲- د حج د احکامو زده کړه وکړئ
د حج مناسک، ارکان، او فرضونه زده کړئ.
که په کوم ځای نه پوهېږئ، له عالمانو پوښتنه وکړئ.
رسول الله ﷺ فرمايي: “من يرد الله به خيرًا يفقهه في الدين”
ژباړه: چا ته چې الله تعالی د خیر اراده وکړي، هغه ته د دین فهم ورکوي.
۳- لمونځونه په جماعت ادا کړئ
د حرم شريف هر لمونځ د ۱۰۰،۰۰۰ لمونځونو اجر لري.
د سهار اذان نه مخکې حرم ته لاړ شئ، تهجد وکړئ، او د قرآن تلاوت ته وخت ورکړئ.
رسول الله ﷺ فرمايي: “صَلاةٌ فِي الْمَسْجِدِ الْحَرَامِ أَفْضَلُ مِنْ مِائَةِ أَلْفِ صَلاةٍ فِيمَا سِوَاهُ” (ابن ماجه).
۴- د قرآنکریم تلاوت ته ځانګړی وخت ورکړئ
د قرآن نزول په مکه کې شوی، نو هلته يې تلاوت خاص روحاني اثر لري.
ځینې علماء وايي، دلته د هرې نیکۍ بدله یو لک چنده ورکول کیږي.
“بکل حسنة مائة ألف حسنة” (الحاکم و البیهقي).
۵- د خپلو ملګرو سره ښه اخلاق وساتئ
د خپلو ملګرو عزت وکړئ، هغوی مه ازاروئ.
د غیبت، حسد، او بدو خبرو څخه ځان وساتئ.
د حرمینو شریفینو تقدس ته پوره احترام وکړئ، ځکه چې دلته ګناهونه هم دروند وزن لري.
۶- اسلامي حجاب ته پوره پام وکړئ
مسلمانې خويندې دې د حجاب مراعات وکړي، یوازې د احرام پر مهال مخ لوڅیدای شي.
مسلمان وروڼه دې د نامحرمو له کتو ځان وساتي، ځکه چې الله تعالی حکم کړی:
“قُلْ لِلْمُؤْمِنِينَ يَغُضُّوا مِنْ أَبْصَارِهِمْ”
“وَقُلْ لِّلْمُؤْمِنَاتِ يَغْضُضْنَ مِنْ أَبْصَارِهِنَّ”
۷- د طواف، دعا، او نفلي عمرې اهمیت درک کړئ
هر اووه دورې طواف د یو غلام آزادولو ثواب لري (ترمذي – 959).
د بدن توان ته پام وکړئ، ځان ستړی نه کړئ.
د طواف پر مهال دعاوې وکړئ، زړه مو حاضر وساتئ، او د الله ذکر زیات کړئ.
۸- د حج پر مهال عکاسي او فلمبرداري مه کوئ
د حرمینو شرافت ته پام وکړئ، د عبادت ځایونه د سیلګرۍ ځایونه مه جوړوئ.
رسول الله ﷺ فرمايي: “إِنَّ أَشَدَّ النَّاسِ عَذَابًا يَوْمَ الْقِيَامَةِ الْمُصَوِّرُونَ” (بخاري او مسلم).
ژباړه: د قیامت په ورځ به تر ټولو سخت عذاب د تصویر جوړوونکو وي.
۹- د عرفات په ورځ دعا ته ځانګړی وخت ورکړئ
دا د بخښنې، توبې، او دعا تر ټولو غوره فرصت دی.
شیطان دا ورځ تر ټولو زیات خوار او ذلیل وي.
رسول الله ﷺ عرفات ته د دعا لپاره د مسکین غوندې لاسونه پورته کول.
په زوره وژاړئ، د خپل ځان، خپلوانو، او ټول امت لپاره دعا وکړئ.
۱۰- د رسول الله ﷺ مسجد ته درناوی وکړئ
د مدینې منورې د سفر پر مهال د رسول الله ﷺ مسجد ته په ادب، عاجزۍ، او محبت لاړ شئ.
هلته د عبادت او د رسول الله ﷺ پر سلام تمرکز وکړئ.
رسول الله ﷺ فرمايي: “مَنْ زَارَنِي بَعْدَ مَوْتِي، فَكَأَنَّمَا زَارَنِي فِي حَيَاتِي” (بيهقي).
ژباړه: څوک چې زما له وفات وروسته ما ته راشي، داسې ده لکه زما د ژوند پر مهال چې ما ته راغلی وي.
وروستی وصیت: د کتاب او سنتو پابند اوسئ!
الله او د هغه د رسول اطاعت وکړئ، ترڅو الله تعالی تاسو ته رحم وکړي.
الله تعالی فرمايي: “وأطيعوا الله والرسول لعلكم تُرحمُون”
يادونه
الله تعالی تاسو ته یو قبول شوی حج او برکتناک سفر درکړي! آمین.
