د اسرائیلو د پوځ د پوځي استخباراتو مشر تورن جنرال اهارون هلیوا له خپلې دندې استعفا کړې ده.
په یوه لیک کې، هغه ومنله چې د هغه د استخباراتو ادارې یې “هغه دنده چې موږ ته سپارل شوې وه، نه ده ترسره کړې”.
د پوځ په بیان کې ویل شوي چې هغه به د خپل ځای ناستي له ټاکلو وروسته له دندې لاس په سر شي.
اهارون هلیوا په غزه کې د جګړې له پیله لږ وروسته وویل چې هغه د استخباراتي ناکامیو مسؤلیت منلی چې د اکتوبر په اومه د حماس د برید لامل شو.
په دغه برید کې ۱۲۰۰ کسان ووژل شول او لږ تر لږه ۲۵۰ کسان د حماس او د هغې د متحدو ملېشو له خوا یرغمل شول.
په ځواب کې اسرائیلو په غزې تړانګه کې پراخ پوځي عملیات پیل کړل چې د حماس د روغتیايي چارواکو په وینا، تر اوسه پورې لږ تر لږه ۳۴ زره کسان وژل شوي دي.
هغه لومړنی لوړ پوړی اسرائیلی چارواکی دی چې د اکتوبر د اومې نېټې د خونړي برید له امله استعفا ورکوي.
تر دې وړاندې هغه د اسرائيلي پوځ د بېلابېلو څانګو مشري کړې وه، چې په هغو کې عملياتي څانګې او همدارنګه د ټيکنالوژۍ او لوژستيک څانګې هم شاملې وې.
شنونکي وايي چې د هغه استعفا ښايي د نورو اسرائیلي چارواکو د استعفا لپاره لاره هواره کړي.