اربعين النوويه – د بدعت رد
له ام المؤمنين عايشه رضی الله عنها نه روايت دی چې رسول الله صلی الله عليه وسلم فرمايلي: «مَنْ أَحْدَثَ فِي أَمْرِنَا هذَا مَا لَيْسَ مِنْهُ فَهُوَ رَدٌّ»([1]).
ژباړه :هر چا چې زمونږ په دين کې څه شی پيدا کړل چې له مونږ څخه نه وي (په اسلام کې نه وي ) پس هغه شی مردود دی ( د قبول وړ نه دی) .
تشريح :
« رَدٌّ» په معنی د مرود او باطل .
دا حديث شريف په دين کې يو ستره قاعده ده ، هر هغه عمل چې د اسلامي شريعت (قرآن او سنتو ) د حکم او امر موافق نه وي ، يعنې په دين کې نوي پيدا شوی عمل چې په دين کې کوم اصل ونلري ( ځکه چې دين پوره شوی دی ) بدعت دی او هر بدعت ګمراهي ده ( د دين څخه انحراف دی ) .
د بدعت تعريف :
بدعت په لغت کې نوي پيدا شوی شي ته وايي ،د بدعت شرعي معنی دا ده چې په دين کې د څه کار زياتوالی او کموالی کوم چې په قرآن او سنتو کې يې هيڅ ثبوت نه وي يعنې نه په قرآن کې د هغه څه ثبوت وي او نه د نبی صلی الله عليه وسلم نه د هغه د کولو ثبوت نه قولاً ،نه فعلاً ،نه صراحةً او نه هم اشارة ً ثابت وي .
يا په بل عبارت : بدعت په لغت کې هر نوي پيدا شوي شی ته وايې چې مخکې يې کومه نمونه نه وي مګر د شريعت په اصطلاح کې د الله تعالی عبادت کول په نا مشروع او ناجايز ډول يا په داسې طريقه عبادت کول چې د رسول الله صلی الله عليه وسلم او خلفای راشدينو په طريقه نه وي بدعت بلل کيږي .
قرآني دليل ، الله تعالی فرمايي:[أَمْ لَهُمْ شُرَكَاءُ شَرَعُوا لَهُمْ مِنَ الدِّينِ مَا لَمْ يَأْذَنْ بِهِ اللَّهُ ]
ژباړه:آيا دغه خلکو د الله پاک سره داسې شريکان نیسي چې د دوی د پاره د دين داسې طريقې غوره کړي چې الله د هغه اجازه نه ده کړې .
دوهم دليل سنت ، رسول الله صلی الله عليه وسلم فرمايي: «عَلَيكُم بِسُنَّتي وَ سُنَّةِ الخُلَفاءِ الرّاشِدينَ المَهدِيِّينَ، عَضُّوا عَلَيها بِالنَّواجِذِ، وَ إيّاكُم وَ الأُمُورَ المُحدَثاتِ» (احمد ، ابن ماجه ، ترمذي و ابن حبان ) .
ژباړه: تاسې زما په طريقه او په طريقه د خلفای راشدينو منګولې ونيښلوئ او هغه په عقلي غاښونو سره ټينګ ونيسئ او له نويو امورو څخه پرهيز وکړﺉ .
په بدعت کې درجی دی بعضی د مکروه په درجه کې دی بعضی د حرامو او بعضی د شرک اکبر په درجه کې دی اصرار کونکی په بدعت په هر حال کې فاسق دي .
د بدعت خطرناکې پايلې :
۱- د بدعت اعمال مردود دي يعنی د قبول وړ نه دي :
پيغمبر صلی الله عليه وسلم فرمايي: «مَنْ أَحْدَثَ فِى أَمْرِنَا مَا لَيْسَ مِنْهُ فَهُوَ رَدٌّ» (متفق عليه ) .
ژباړه: هر چا چې زمونږ په دين کې څه شی پيدا کړل چې له مونږ څخه نه وي (په اسلام کې نه وي ) مردود دی.
۲- بدعتي تر هغه چې په بدعت لګيا وي توبه يې نه قبليږي نو ځکه ددی ويره شته چې په بده خاتمه له دنيا څخه رحلت وکړي ، پيغمبر صلی الله عليه وسلم فرمايي : «إن الله حجب التوبة عن صاحب كل بدعة حتى يدع بدعته» (الطبراني)
ژباړه : الله تعالی تر هغې پورې د هر بدعت کوونکې توبه نه قبلوي تر څو چې هغه ترک نه کړي .
۳- بدعتي حوض ته نشي تلای او د رسول الله صلی الله عليه وسلم له شفاعت څخه بې برخې وي .
پيغمبر صلی الله عليه وسلم فرمايي : «أَنَا فَرَطُكُمْ عَلَى الْحَوْضِ، لَيُرْفَعَنَّ إِلَىَّ رِجَالٌ مِنْكُمْ حَتَّى إِذَا أَهْوَيْتُ لأُنَاوِلَهُمُ اخْتُلِجُوا دُونِى فَأَقُولُ: أَىْ رَبِّ أَصْحَابِى. يَقُولُ: لاَ تَدْرِى مَا أَحْدَثُوا بَعْدَكَ» (البخاري ).
ژباړه: زه تاسې نه مخکې حوض ته رسيږم او له تاسې څخه ځنې خلک ښکاره شي او ناګاهانه بيرته ورک شي ، وايم : ای ربه ! زما ملګري دی څه کړل ؟ وبه ويل شي نه پوهيږي چې وروسته له تا نه هغوی څه کړي دي .
او په بل روايت کې دي : «إِنَّكَ لاَ تَدْرِى مَا بَدَّلُوا بَعْدَكَ فَأَقُولُ: سُحْقًا سُحْقًا لِمَنْ بَدَّلَ بَعْدِى»(البخاری دارالکتاب عربي بيروت ).
يقيناً ته نه پوهيږی چه وروسته له تا څخه څومره عوض او تغير شوي ، وايم به : څوک چې وروسته له ما نه تغير شوی وي له ما نه دې لرې وي .
۴- ګناه به د هر هغه چا د قيامت تر ورځې د بدعت رواج کونکي پر غاړه وي چا چې دده په بدعت عمل کړی وي ځکه چې پيغمبر صلی الله عليه وسلم فرمايي: « … وَمَنْ سَنَّ سُنَّةً سَيِّئَةً كَانَ عَلَيْهِ وِزْرُهَا وَمِثْلُ وِزْرِ مَنْ عَمِلَ بِهَا مِنْ غَيْرِ أَنْ يُنْتَقَصَ مِنْ أَوْزَارِهِمْ شَىْءٌ» (رواه مسلم ) .
ژباړه: هر چا چې په اسلام کې د ناوړه او بدې لارې تأسيس وکړ دهغه ګناه او هر چا چې وروسته له هغه څخه په هغه عمل وکړ دده پر غاړه وي بې له دې څخه چې د هغوی له ګناهونو کم شي.
۵- بدعت رواج کونکی او بدعتي ملعون دی .
پيغمبر صلی الله عليه وسلم فرمايي : «مَنْ أَحْدَثَ فِيهَا حَدَثًا، أَوْ آوَى مُحْدِثًا، فَعَلَيْهِ لَعْنَةُ اللَّهِ وَالْمَلاَئِكَةِ وَالنَّاسِ أَجْمَعِينَ» (متفق عليه ) .
ژباړه: هرچا چې په دين کې بدعت را منځته کړ يا یې بدعت ګر ته پناه ورکړه په هغه د الله تعالی ،ملايکو او ټولو خلکو لعنت وي .
۶- بدعت ګماهي ده او دهرې ګمراهیۍ پايله دوزخ دی ځکه پيغمبر صلی الله عليه وسلم فرمايلي: «كُلُّ بِدْعَةٍ ضَلَالَةٌ، وَكُلُّ ضَلَالَةٍ فِي النَّارِ» (مسلم ، ابؤداود ، ابن ماجه ) .
ژباړه: ټول بدعت ګمراهي ده او د ټولو ګمراهیو پايله دوزخ دی .
والسلام ومن الله التوفيق
متن حديث : اربعين النوويه / امام نووي رحمه الله
شرح الحديث / ابن سابق رحمه الله
شرح بدعت / سليم الهلالي
…………………………………………………………………………………………………………………………………………………………………………………………………
که تاسو غواړئ چې علمي او تحقیقاتي لیکنې او مقالې مو په دعوت نیوز کې خپرې شي نو لاندې لینک کیکاږئ او مونږ ته په انلاین بڼه خپله لیکنه را واستوئ؛
https://dawatnews.com/submit-article/
شرعي پوښتنه:
که کومه شرعي پوښتنه لری دمهربانی له مخې لاندې فورم ډک کړی او خپله پوښتنه ثبت کړئ.