حسان مجاهد
**************
لومړۍ برخه
د سریالونو اهداف
په تېرو څو لسیزو کې، په اسلامي ټولنو کې د غیر اسلامي سریالونو خپرونه زیاته شوې ده، چې دا چاره د بېلابېلو غربي هېوادونو او کلتوري شبکو لخوا په قصدي توګه پر مخ وړل کېږي، دغو سریالونو ته په کتو سره، ښکاري چې دا یوازې د تفریح یا ساعتېرۍ لپاره نه خپرېږي او نه یوازې ددې لپاره چې په دې سریالونو پانګونه کېږي، بلکې ددې سریالونو ترشا دوی ډېر ژور اهداف لري لکه:
_سیاسي اهداف
غربي ځواکونه په اسلامي هېوادونو کې د خپلو سیاسي ګټو خوندي کولو په موخه د دې سریالونو په وسیله خلک په غیر مستقیم ډول د خپل نفوذ لاندې راولي. موخه یې دا ده چې خلک د غربي ارزښتونو او سیاست سره آشنا او همغږي شي، په ډېرو سریالونو کې غربي دیموکراسي او قانون د ژوند د غوره بڼې په توګه وړاندې کېږي، چې په دې توګه اسلامي ارزښتونه کمزوري کېږي او د خلکو کلتوري او سیاسي تصور کې بدلون راځي.
_ فرهنګي اهداف
غربي سریالونه د داسې ژوند بڼه او کلتوري ځانګړتیاوې ترویجوي چې له اسلامي ارزښتونو سره په ټکر کې دي. په دغو سریالونو کې بې حیایي، غیر اخلاقي اړیکې، او داسې کلتوري ځانګړنې ځای پر ځای شوي چې د اسلامي ټولنو په کلتوري او ارزښتي شعور منفي اغېز کوي. د غربي ژوند طریقه د یوه مثالي ژوند په توګه وړاندې کېږي، چې اسلامي کلتوري پالیسي ته زیان رسوي.
_ دیني اهداف
غربي سریالونه اکثراً دیني ارزښتونو ته ارزښت نه ورکوي، او ځینې وختونه مذهبي شخصیتونه سپکوي. دا چاره د اسلامي ټولنو په فکري او عقیدوي اړخ ژور اغېز لري او خلک له دیني اصولو لرې کوي. ځینې سریالونه په غیر مستقیم ډول خلکو ته دا احساس ورکوي چې دین یوه پخوانۍ مفکوره ده چې په ننني وخت کې اهمیت نه لري. په دې توګه، خلک تدریجاً له دیني اصولو او ارزښتونو څخه لرې کېږي.
_نظامي اهداف او وېره
غربي سریالونه ځینې وختونه داسې تصویر وړاندې کوي چې اسلامي هېوادونه د جګړو او وېرې مرکزونه دي. دا سریالونه خلکو ته دا پیغام ورکوي چې اسلامي ارزښتونه د پرمختګ خنډ ګرځي او یواځې غربي هېوادونه پرمختللې او سولهییزې ټولنې دي. په دې توګه، د ځوانانو ذهنیت د اسلامي مقاومت او جهاد د فکر څخه لرې کېږي.
_ ټولنیز او اخلاقي انحراف
د غربي سریالونو یو بل خطرناک هدف دا دی چې په اسلامي ټولنه کې اخلاقي او ټولنیز انحراف ته لاره هواره کړي. په دغو سریالونو کې د بې بندوبارۍ، کورنۍ بې اتفاقۍ، او غیر اخلاقي اړیکو صحنې وړاندې کېږي چې د اسلامي ټولنو لپاره د منلو وړ نه دي. دا صحنې په ځوانانو او ماشومانو ژور منفي اغېز کوي او هغوی د خپلو ټولنیزو او دیني ارزښتونو نه بې برخې کوي.
پایله دا چې ددې ټولو دلایلو پراساس، څرګندېږي چې غربي سریالونه نه یوازې تفریح بلکې یوه منظمه طرحه لري چې هدف یې د اسلامي ارزښتونو کمزوري کول او د غربي کلتور ترویج دی. اسلامي ټولنې باید پدې اړه هوښیار وي او د خپلو ارزښتونو ساتنه وکړي.
هغه ناوړه سریالونه چې د مختلفو چینلونو لخوا خپریږي؛ په مسلمانانو کې د بدبختۍ اچولو لپاره لوی کار کوي، چې له جملې څخه یې هغه هندي او ترکي سریالونه هم دي، چې تر ډېره ځوانان او ځوانې ښځې پرې تکیه کوي، کله چې هغوی دې سریالونو ته ساعتونه-ساعتونه وخت ورکړي، نو په ذهنونو او زړونو کې ورته زهرناکه افکار او خراب اخلاق ځای پر ځای کوي.
له دې امله دا اړینه ده چې موږ د دې موضوع په خلاف ودرېږو، ترڅو خلکو ته یې د شر حقیقت څرګند کړو، هغوی ته یې د زیانونو په اړه خبرداری ورکړو او ترې ویې ژغورو.
١_ په اسلامي عقیده باندې د هندي سریالونو منفي اغېز
یو له هغو خطرناکو شیانو څخه، چې دا سریالونه یې د ماشومانو، ځوانانو او ښځو په زړونو کې ځای پر ځای کوي؛ هغه نصراني او بودایي عقاید دي چې په دې سریالونو کې خپریږي. داسې ډېر د فلمونو ستوري(ادا کاران او ډایرېکټران) لیدل کیږي چې یوازې د بوذا یا نورو بتانو په وړاندې سر ټیټوي او د سریالونو له لارې کتونکو ته د بتانو داسې ځواک ور انځوروي چې دغه بتان زموږ سره هر ډول مرسته کولای شي.
کله چې هغوی د هندي ماشومانو صحنې وویني چې د بوذا یا نورو بتانو مخې ته سجده کوي او له هغوی څخه د خپلو هیلو غوښتنه کوي، نو زموږ د مسلمانو ماشومانو په نظريه او عقیده ډېر ناوړه تاثیر غورځوي.
همدارنګه، دا سریالونه د نصرانیانو جشنونه او قربانۍ تمثیلوي، چې په پایله کې یې بیا مسلمانان د کافرانو په جشنونو کې برخه اخلي، او له دې سره د مسلمانانو له زړونو څخه د “ولاء او براء”(له اسلام سره ددوستۍ او کفارو سره د دښمنۍ)عقیده کمزورې کیږي.
نور بیا….