هره کورنۍ باید یو شخصي ډاکټر ولري!

نژدې په ټوله نړۍ کي دا دود دی چي هره کورنۍ شخصي ډاکټر او یا هم قابله لري، خو افغانستان کي دا چاره نادوده ده.
د نړۍ اکثره اوسېدونکي مخکي تر دې چي ناروغ سي خپل شخصي ډاکټر سره لیدني کتني کوي او یا هم روغتونونو ته ورځي، خو زموږ هیواد کي ناروغ هغه مهال روغتون ته وړل کېږي چي د ځکندن ورسره حملې سي.
که څه هم اوس افغانستان کي BPHS لومړني روغتیايي خدمات تر ډېره حل سوي، خو بیا هم خلک یا ورسره بلد نه دي یا ئې هم په اړه معلومات نه لري.
دلته اوس هم اوسېدونکي د نورو کسانو له خولې په اورېدلو ډاکټرانو پسې ګرځي.
کله چي نابلده ناروغان او د هغوی خپلوان له داسي ډاکټرانو سره مخ کېږي نو ډاکټر خپل جېب، درملتون والا او شرکت ته حساب کوي او خلک شکوي.
⇄که چېري هره کورنۍ ډاکټر او یا هم قابله ولري نو لاندي ګټي به ئې کړي وي:
: نور به درملتون والا پلنډي درمل نه درکوي، د ډاکټر له فيصدۍ څخه به خلاص وي او تر څنګ به د شرکتونو له نېټه تېرو درملو څخه هم بېغمه وي.
: په طبابت کي ځیني تاریخچې اخستل ډېري اړیني دي او دا تاریخچې د ناروغيو په تشخیص او درملنه کي ۵۰ سلنه ګټه لري.
په داسي تاریخچو کي د ناروغ کورنۍ، چاپېریال، په کور کي د کورنۍ د غړو شمېر، د ناروغ مسؤلیتونه او داسي نور په کښي ساتل کېږي او تر څنګ ئې د رواني نارغیو معلومات هم په کښي وي.
همدا راز د ناروغ کورنۍ د غړو په اړه هم پوښتل کېږي چي ځیني ناروغۍ په وراثتي ډول یا میراث پاتېږي د یوه شخص څخه بل شخص ته انتقالېدای سي.
د بېلګي په ډول: شکره، د زړه ناروغۍ، یا هم جنیټکي مسایل.
: مخکنیو کتنو ته په کتو باید ناروغ ته نور درمل ورکړل سي ځکه چي هر انټي بیوټیک هر مهال اغېز نه لري، داسي هم کېدای سي د انسان معافیتي سیسټم کوم عکس العمل ښکاره کړي، قبول ئې نه کړي یا ئې د وجود معافیتي سیسټم سخت کمزوری وي زور ئې په ونه رسېږي.
: اقتصادي تاریخچه؛ د انسان د وس خبره ده څونه ګټلای سي، څنګه خواړه اخلي، د کومو خوړو څخه ګټه اخلي؟
خوراکي رژیم زښت اړین دی، په ورځ کي درې ځله خوراک، په خوراکونو کي بدلون، د ساړه سوو خوراکي توکو بیا ځلي نه او یا هم څنګه استعمال او داسي نوري چاري هم د همدې تاریخچې برخي دي.
: شخصي تاریخچه؛ دا انسان شخصآ څنګه دئ، چېري او له چا سره ناسته او ولاړه لري، کار ځای ئې څنګه دئ، او کوم عمل خو به نه لري؟
څو تاریخچې نوري هم موږ په غیر مستقیم ډول اخستلای سو لکه رواني او فزیکي.
که چېري د یوه ناروغ څخه منظمه او درسته تاریخچه واخستل سي نو دا باور درکولای سم چي ناروغ مو ۵۰ فیصده تشخیص سوی او درملو ته ئې ۵۰ فیصده اړتیا سته چي هغه درملو په ټاکنه کي هم ښه مرسته درسره کولای سي.