“بېشکه، دا قرآن هغه لارې ته هدایت کوي چې تر ټولو سمه ده”
(الإسراء)
د قرآن تلاوت پر مهال ۱۵ نیتونه چې باید په زړه کې ولرو
۱. د زړه، روح، او بدن د شفا لپاره
قرآن د هرې ناروغۍ لپاره درمل دی، الله تعالی فرمایي:
“او موږ له قرآنه هغه څه نازلوو چې د مؤمنانو لپاره شفا او رحمت دی.” (الإسراء)
۲. د هدایت غوښتلو لپاره
قرآن هغه لارښود دی چې انسان د حق لارې ته بیايي، الله تعالی فرمایي:
“دا کتاب چې شک پکې نشته، د متقیانو لپاره هدایت دی.” (البقرة)
۳. د الله تعالی سره د مناجات او قرب لپاره
کله چې ته قرآن لولې، ته د خپل رب سره خبرې کوې. رسول الله ﷺ فرمایلي:
“چا چې وغوښتل چې له خپل رب سره مناجات وکړي، نو قرآن دې ولولي.” (طبراني)
۴. د علم حاصلولو او عمل کولو لپاره
قرآن یوازې د لوستلو لپاره نه، بلکې د تدبر او عمل لپاره نازل شوی. الله تعالی فرمایي:
“دا یو بابرکته کتاب دی چې موږ ته مو نازل کړی، څو خلک د دې آیتونو تدبر وکړي.” (ص)
۵. د زړه ژوندي کولو او له سختۍ څخه د پاکولو لپاره
قرآن د زړونو ژوند دی، الله تعالی فرمایي:
“ایا هغه کس چې مړ و، بیا مو ژوندي کړ، او موږ هغه ته یو نور ورکړ چې د خلکو ترمنځ ورسره ځي…” (الأنعام)
۶. د دنیا او آخرت لپاره د نور پیدا کولو لپاره
قرآن د دنیا په تیارو کې رڼا ده، او د قبر او آخرت لپاره نور دی. الله تعالی فرمایي:
“بېشکه تاسو ته له الله څخه یو نور او ښکاره کتاب راغلی.” (المائدة)
۷. د قیامت په ورځ د قرآن د شفاعت لپاره
قرآن به د خپلو لوستونکو لپاره شفاعت کوي، رسول الله ﷺ فرمایلي:
“قرآن ولولئ، ځکه چې دا به د خپلو اهل لپاره د قیامت په ورځ شفاعت کوي.” (مسلم)
۸. د دنیا او آخرت د درجې لوړولو لپاره
قرآن هغه کسان لوړوي چې ورسره تعلق لري، رسول الله ﷺ فرمایلي:
“بېشکه الله د دې کتاب په وسیله ځینې خلک پورته کوي، او ځینې نور یې پرې ښکته کوي(چه قران کریم نه لولئ او عمل هم پري نه کوئ).” (مسلم)
۹. د الله د حکم پیروي لپاره د ترتیل او تدبر سره
الله تعالی موږ ته امر کړی چې قرآن د ترتیل او تدبر سره ولولو، فرمایي:
“او قرآن ترتیل سره (په غور او سوچ فکر سره ئي ولوله).” (المزمل: ۴)
۱۰. د جنت ته د داخلیدو لپاره
رسول الله ﷺ فرمایلي:
“د قرآن حافظ ته به وویل شي: ولوله، او پورته شه، او ترتیل وايه، ځکه ستا منزلت به د هغې آخري آیت سره وي چې ته یې لولې.” (ترمذي)
۱۱. د الله تعالی د محبت ترلاسه کولو لپاره
رسول الله ﷺ فرمایلي:
_“الله ته ځینې خاص خلک شته، چا ته چې الله خپل اهل فرمایلي دي.” خلکو وپوښتل: څوک دي؟ هغه وفرمایل: د قرآن خلک، د الله اهل او خاص بندګان دي.” (ابن ماجه)
۱۲. د دې لپاره چې قرآن زموږ لپاره حجت شي، نه زموږ پر ضد
رسول الله ﷺ فرمایلي:
“قرآن یا حجت دی ستا لپاره، یا به حجت وي ستا پر ضد.” (مسلم)
۱۳. د فتنو او ګمراهۍ څخه د ژغورلو لپاره
څوک چې د قرآن سره تعلق وساتي، هیڅکله به ګمراه نشي، رسول الله ﷺ فرمایلي:
“زه په تاسو کې داسې دوه شیان پرېږدم، چې که تاسو یې مضبوط ونیسئ، هېڅکله به ګمراه نشئ: د الله کتاب او زما سنت.” (حاکم)
۱۴. د قبر لپاره د ملګرتیا او د صراط لپاره د نور ترلاسه کولو لپاره
که چیرې قرآن ستا د دنیا ملګری شي، نو دا به ستا د قبر یوازینی انیس وي او د صراط پر پل به رڼا درکړي.
۱۵. د الله تعالی سره د یوه ګټور تجارت لپاره
قرآن تر ټولو غوره سرمایه ده، الله تعالی فرمایي:
“بېشکه هغه کسان چې د الله کتاب لولي، لمونځ قايموي، او زموږ له ورکړي رزق نه خرچ کوي، هغوی د داسې تجارت امید لري چې هېڅکله به تباه نشي.” (فاطر: ۲۹)
په دې نیتونو سره، تل د قرآن تلاوت کوئ!
قرآن یوازې د لوستلو لپاره نه، بلکې د تدبر، شفا، هدایت، او د دنیا او آخرت د بریا لپاره نازل شوی. دا د الله تعالی حبل المتین (کلک رسۍ) ده، څوک چې پرې ونیسي، نجات به ومومي، او څوک چې یې پریږدي، نقصان به وکړي.
الله تعالی دې موږ ټولو ته د قرآن د فهم، تدبر، او عمل توفیق راکړي، آمین!
ژباړه: مفتي خالد منصور هډه وال
