سيرت مصطفی ﷺ؛ د مينې او لارښونې کیسه حصه(5)

جمع او ترتيب خالد منصور هډه وال

*******************************************************

📚 د رسول الله ﷺ سیرت د صحیحې سنت او سلفو آثارو څخه

▪ پنځمه برخه:

▪ د هغه ﷺ پالونکې ښځې:

▪ ام ایمن رضي الله عنها:

ـ امام ابن کثیر په “البداية والنهاية” کې لیکي: امام بخاري په “التاریخ” کې د زُهري رحمه الله له قوله راوړي: “ام ایمن به نبي کریم ﷺ روزله، تر هغه چې لوی شو، نو نبي کریم ﷺ هغې ته ازادي ورکړه، بیا یې د زید بن حارثه سره واده کړه، او هغه د نبي کریم ﷺ له وفات څخه پنځه میاشتې وروسته وفاته شوه.”

(دا خبره د سیرت په کتابونو کې مشهوره ده.)

ـ ویل شوي: هغه نبي کریم ﷺ ته له خپل پلار څخه په میراث پاتې وه.

 

– د ام ایمن اصل نوم:

برکه بنت ثعلبة بن عمرو بن حصن بن مالک بن سلمة بن عمرو بن نعمان.

 

– لقب:

د “ام ایمن” په کُني مشهوره ده، دا کُني د هغې زوی “ایمن” ته منسوبه ده، چې د هغې له لومړي خاوند عبید بن زید څخه زیږېدلی و.

 

– بل نوم:

هغه د “ام الظباء” په لقب هم یادېدله.

 

– اصل:

ویل شوي چې د حبشو وه، خو امام نووي وايي: “بعضې علماء وایي چې هغه حبشیه نه وه، بلکې بله ښځه حبشیه وه.”

 

– خاوندان:

ام ایمن د جاهلیت په زمانه کې په مکه کې د عبید بن زید الخزرجي سره واده کړی و، او ترې ایمن زوی پیدا شوی و. له هغه وروسته یې د زید بن حارثه سره واده وکړ.

 

– د زید بن حارثه مقام:

هغه د نبي کریم ﷺ مولا (ازاد کړی شوی غلام) او “محبوب” و.

– زامن:

1. ایمن بن عبید – د ام ایمن زوی، چې د خپلې مور په نوم شهرت لري، ځکه چې هغې د نبي کریم ﷺ پالنه کړې وه.

2. اسامه بن زید – د نبي کریم ﷺ محبوب زوی او د هغه د محبوب د زوی زوی.

– د ایمن شهادت:

ایمن د حنین په غزا کې د نبي کریم ﷺ سره ثابت پاتې شو، کله چې نور خلک تښتېدلي وو، او هغه هم په دې جګړه کې شهید شو.

 

– نبي کریم ﷺ د ام ایمن کور ته تګ:

انس رضي الله عنه وايي: ابو بکر رضي الله عنه له عمر رضي الله عنه سره وویل: “راځه د ام ایمن کور ته لاړ شو، لکه څنګه چې نبي کریم ﷺ به ور ته تله.” کله چې ورسېدل، ام ایمن وژړل. هغوی ورته وویل: “ولې ژاړې؟

آیا ته نه پوهېږې چې الله نبي کریم ﷺ ته تر دې دنیا غوره نعمتونه ورکړي دي؟” ام ایمن وویل: “زه پوهېږم چې الله تعالی نبي کریم ﷺ ته غوره اجر ورکړی، خو زه پر دې ژاړم چې وحې بنده شوې ده.” نو دوی دواړه هم ورسره وژړل. (مسلم: 2454)

 

– د نبي کریم ﷺ صبر او محبت:

انس رضي الله عنه وايي: نبي کریم ﷺ د ام ایمن کور ته ولاړ، هغې ورته د څښلو یو لوښی ورکړ، خو نبي کریم ﷺ وانه خیست، یا خو روژه وو یا یې څښل نه غوښتل. نو ام ایمن غوصه شوه، شور یې جوړ کړ او نبي کریم ﷺ ته یې سختې خبرې وکړې. (مسلم: 2453)

 

– د ام ایمن زامنو سره د نبي کریم ﷺ محبت:

عبدالله بن عمر رضي الله عنه د ام ایمن زوی “حجاج بن ایمن” ولید او ویې ویل: “که رسول الله ﷺ دا هلک لیدلی وای، حتماً به یې خوښ شوی وایي !” (بخاري: 3737)

همدارنګه یې د محمد بن اسامه بن زید په اړه وویل: “که رسول الله ﷺ دا هلک لیدلی وای، حتماً به یې خوښ کړی وای!” (بخاري: 3734)

# پای، راتلونکې برخه به ان شاء الله راشي.

د رحمت پېغمبر ﷺ درسونه شريک کړئ!

ملګريو، د نبوي سيرت درسونه يوازې زموږ لپاره نه، بلکې د ټول امت لپاره لارښوونه ده. راځئ چې دغه زرین درسونه نورو ته ورسوو، ځکه د علم خپرول صدقه جاريه ده. رسول الله ﷺ فرمایلي:
“هغه څوک غوره دی چې د خلکو لپاره ګټه رسوي.”

راځئ د نبوي لارښوونو څراغونه بل کړو او د دې صدقې ثواب تر قیامت پورې جاري وساتو.