د نړۍ تر ټولو ګرانبیه فرانسوی فوټبال لوبغاړی پال پوګبا په دې ورځو کې د مسلمانانو تر ټولو سپېڅلي ښار مکه معظمه کې دی.
نوموړی د روژې میاشتې په پار هلته شپې ورځې تېروي.
د نړیوال فوټبال فرانسوي لوبغاړي پال پوګبا د یکشنبې په ورځ له مکې معظمې یو انځور خپور کړی او لیکلي یې دي چې: “تر ټولو ښکلی شی چې ما په ژوند کې ولید”.
پر دې سربېره یې یوه بل ټوېټ کې ټولو ته د روژې مبارکي ویلې: “روژه میاشت مو مبارک شه”.
ویل کېږي دا ۲۴ کلن فوټبالر تېر کال هغه مهال تر ټولو ګرانبیه لوبغاړی شو چې د برتانیا مانچسټر یونایټېډ کلب یې له ایټالوي کلب یووینټس څخه د ۸۹ میلیون پونډو په بدل کې ترلاسه کولو پرېکړه وکړه.
د چهارشنبې په ورځ د اروپا لیګ جام پایلوبه کې پال پوګبا د مانچسټر یونایټېډ له خوا ګډون کړی و.
د دې لوبو په پای کې پال پوګبا له یوه بکس سره خپله ویډیو خپره کړه او ویې ویل “د عبادت لپاره د سفر موزې پر پښو کوي او د عمرې لپاره ځي”.
له دې مخکې هم پوګبا یو ځل مکې معظمې ته تللی او د اسلام پنځم رکین یا ستن (حج) یې کړی دی.