زه دیو سړی سره په فیسبوک کی چټ کوم هغه ماته خور وايي  او هغه وایی چې ته په ما باندی ډیره ګرانه یی اوهغه وايي……. …می لیدلی وای .

ځواب

بسم الله الرحمن الرحيم

د شريعت په حدودو کې د دعوت الی الله ، ديني پوښتنې او ضرورت پرته د بيګانه سړي او بيګانه ښځې تر مينځ چټ (الکتروني خبرې) او ملګري د شهوت رانۍ ، عشق بازۍ او شيطاني دام پرته بل څه نه دي چې دا کار له شک پرته حرام او پايلې يې خطرناکې دي .

مسلمان نارينه او ښځو ته حکم شوی چې له نامحرمو خپل نظر وساتي لقوله سبحانه و تعالی : [وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ] (النور ۳۱ ) .

او د ضرورت پرته به د بيګانه سره خبرې نه کوي ځکه بيګانه ښځې ته د شهوت ، او عشق رانۍ په مقصد نظر کول او د هغې سره خبرې د زنا يو حصه ده .

رسول الله صَلَّى اللَّهُ عَلَيْهِ وَسَلَّمَ فرمايلي:« إِنَّ اللَّهَ كَتَبَ عَلَى ابْنِ آدَمَ حَظَّهُ مِنْ الزِّنَا أَدْرَكَ ذَلِكَ لا مَحَالَةَ فَزِنَا الْعَيْنَيْنِ النَّظَرُ وَزِنَا اللِّسَانِ النُّطْقُ وَالنَّفْسُ تَمَنَّى وَتَشْتَهِي وَالْفَرْجُ يُصَدِّقُ ذَلِكَ أَوْ يُكَذِّبُهُ» ) رواه البخاري (6243) ومسلم (2657).

ژباړه : الله تعالی د ابن آدم د پاره د زنا يو حصه تعين کړی ده ، پس د سترګو زنا نا محرم ته کتل دي ، د ژبه زنا خبرې کول دي او د نفس زنا د هغه هيله او آرزو کول او غوښتل دي ، دا شرمګا ده چې بيا د هغه يا تصديق کوي او يا تکذيب .

همدارنګه رسول الله صلی الله عليه وسلم : د بيګانه نارينه او ښځې له کډون او اختلاط څخه منع فرمايلي ده .

«إِيَّاكُمْ وَالدُّخُولَ عَلَى النِّسَاءِ» (بخاری ۵۲۳۲ ) .

د بيګانه ښځو د خلوت نه ځان وساتئ .

♣♣♣♣♣

يقيناً چې په هره ګناه کې څه عيش او خوند شته ، د بيګانه سره په ملګرۍ ، خبرو او عشق رانۍ کې هم څه عيش او خوند شته خو دا خوند لږ او تلونکی دی خو بدنامي او خطرناکي پايلي به يې پر ځای وي .

د خوندونو د لارې انتخاب په اصل کې ځان ته د دوزخ د لارې انتخاب دی  :«وحفت النار بالشهوات» (او دوزخ په شهوتونو پوښل شوی دی).

♣♣♣♣♣

واورئ ! که تاسې دا نه خوښوئ چې د انټرنيټ او تليفون له لارې مو خپله مور ، خور يا ښځه له بيګانه سړي سره خبرې وکړي هغه هم د عشق او محبت نو د بل کس مور ، خور او ښځې ته هم په همدې سترګه ګورئ .که د ځان عزت غواړئ نو د بل عزت وکړئ .

دا خو د غرب د لنډغرې ډيموکراسۍ او د ډيموکراسۍ پر ځنځيرونو باندې تړل شويو فاسقانو او فاجران کار دی چې غواړي د مسلمانانو په مينځ کې همداسې کارونه رواج کړي ځکه د دوی د شيطاني مډيا همدا اصل او قانون دی.

او د هغو بې بنده باره کورنيو کار دی چې پخپل اولاد او ښځو کنترول نلري، الف يې په جګر کې نه وي ، د حق او باطل تميز کولای نشي د انټرنيټ او پرمختللی تليفون زمينه يې ورته برابره کړې وي.