مړي ته کفن ورکول پر مسلمانانو فرض کفايي دی .
د سړو لپاره سنت کفن دری جامې دی ،يو څادر، دوهم لنګ (پرتوګ ) او دريم قميص چه د څادر اوږدوالی د بنې آدم د قد نه يولاس قدر زيات وي او پلنوالی يې دومره چه ټول بدن پکې ونغښتی شي .
همدا شان د لنګ پلنوالی به د څادر په اندازه وي او اوږدوالی به يې د څادر نه يوه لويشت کم وي او د قميص پلنوالی هم د لنګ او څادر په اندازه دی خو اوږدوالی يې د چټ نه د دواړو شرمګاهو پورې وي .
د قميص ټوټه به د سر طرف نه دومره وشلوي چه سر پکې لاړشي چه په همدی وجه قميص ورته وايي .
د نر د کفن لپاره تقريباً 12 کزه رخت ته ضرورت دی .
مګر که ضرورت وي د نارينه د پاره يو جامه کفن چې ټول بدن يې پټ کړي کفايت کوي .
د ښځو کفن پنځه جامې په کفن کې د دريو جامونه علاوه دوی جامې نوری هم پکار دي چه يو سربند او بل سينه بند وي.
د سينه بند پلنوالی د څادر يا لنګ په اندازه وي مګر اوږدوالی يې له تخرګ څخه تر زنګون پورې وي.
او سربند د يوه ګز نه څه کم پلن او د ګز نه څه زيات اوږد پکار دی .
د غسل له پردې سره د ښځی د کفن لپاره تقريباً 21 کزه رخت ته ضرورت دی .
د ضرورت پر مهال د ښځو لپاره دری جامې کفن هم کفايت کوي بغير له ضرورت او مجبورۍ جواز نلري.
د کفن ورکولو طريقه :
اول به په پاکه تخته يا پاک پوزي باندې د کفن چادر هوار کړي د هغه له پاسه به لنګ وغوړوي او د هغی د پاسه د قميص نيمه حصه وغوړوي او نيمه به ونغاړي د سر طرف ته يې د کيږدئ .
ورسته به مړی له تختې را پورته کړئ د کفن د پاسه به يې کيږدئ ،ورسته به د قميص نغښتې حصه کې سر ور ننباسئ او تر شرمګاه پوری به يې خوره کړئ .
دغه شان به څادر هم ونغاړئ او د څادر دواړه سرونه به په ټوټه وتړئ چه نه ښوري .
د ښځو په کفن کې د قميص اغوستلو نه پس د هغې د سر ويښتان دوه ځايه کړئ او په سينه دې ورته خواره کړي ،بيا دې سربند ددې د پاسه واچوي د هغه نه پس د سينه بند ونغاړي .
په کفن او د مړي د سجدې په ځايونو ،دلاسونو په ورغوي کونډې او پښو کافور يا عطر يا بل کوم ډول خوشبو ووهئ .
د کفن او قبر مصارف د مړي له پاتې مال څخه ادا کيږي که له مړي څخه څه شی نوي پاتې بيا پر هغه چا لازم دي چا يې چه د نفقې مسئوليت په غاړه لرلو .
او که يې کوم چا ته د کفن اوغسل وصيت کړي وي بيا به يې هغه کس ادا کوي.